მან გადადგა უკანასკნელი ნაბიჯი ტრიუმფისკენ და სამუდამოდ დაიმკვიდრა ადგილი ისტორიაში. და ეს დაუსრულებელ ნაბიჯად იქცა. 120 გრძელი წუთი დასჭირდა მსოფლიოს ახალი ჩემპიონის ვინაობის გარკვევას, ორი მტანჯველი საათი, რომელშიც ესპანეთი აშკარად აღემატებოდა მეტოქე ჰოლანდიას. მაგრამ ბურთს კარში შესვლა არ სურდა. ანდრეს ინიესტამ გაიტანა გოლი, რომელიც არ ეკუთვნოდა მხოლოდ მას, არც დანარჩენ 22 ფეხბურთელს, არც ვისენტე დელ ბოსკეს, არც "სოქერ სითის", არც სრულიად ესპანეთს, არა, მილიონობით ადამიანს, რომელიც იმ ღამეს "ფურია როხას" გამარჯვებაზე ოცნებობდა. 11 ივლისს, სამხრეთ აფრიკაში, მოხდა ამბავი, რომელიც არასდროს არავის დაავიწყდება. ეს იყო დღე, როდესაც იკერ კასილასმა იოჰანესბურგის ზეცაში აღმართა საოცნებო თასი. ახალმა, საოცარმა თაობამ ესპანური ფეხბურთის კიდევ ერთი გვერდი შეავსო ოქროს ასოებით. ის მსოფლიო ჩემპიონად იქცა ! ეს არ იყო ადვილი, მხოლოდ პირველი 45 წუთის გახსენებისთანავე დარწმუნდებით ამაში. მაგრამ "ფურია როხას" დასაწყისიდან დასასრულამდე ძირითადად ხელთ ეპყრო მატჩის სადავეები. გუნდები მეომრებივით გამოვიდნენ მოედანზე, სურდათ, ეჩვენებინათ ერთმანეთისთვის, რომ ტიტულის მოსაგებად არავინ არაფერს დათმობდა. ესპანეთის ეროვნული ნაკრები პირველი გამოდგა, რომელმაც ხიფათი შექმნა მეტოქის კართან და მილიონობით ადამიანს აუჩქარა გულისცემა. სერხიო რამოსის უძლიერესი თავური მაარტენ სტეკელენბურგმა უკუაგდო. ხუთიოდე წუთის შემდეგ ისევ ანდალუსიელი ცდილობდა კარის აღებას, მაგრამ მისი დარტყმა ცენტრალურმა მცველმა მოიგერია.და მაშინ, ჰოლანდიელებმა გადაწყვიტეს, თამაშის წესის დარღვევის საშუალებით შეეჩერებინათ გააქტიურებული ოპონენტები. ვან პერსის, ვან ბომელისა და დე იონგის უხეშობები შესაძლოა წითელი ბარათებით დასრულებულიყო, მაგრამ ჰოუარდ უებმა ისინი დაინდო. ამ არცთუ სპორტულმა ტაქტიკამ არათუ მხოლოდ მთელი შეხვედრის მანძილზე გასტანა, არამედ უფრო და უფრო შეიძინა ინტენსიურობა.
მატჩის მეორე ნახევარში ჰოლანდიამ ხელი აიღო პოზიციურ შეტევებზე, არჩია თავი დაეცვა ესპანელთა შეტევებისგან და კონტრ-იერიშებზე ზრუნვა დაეწყო. "ფურია როხას" საგოლე მომენტებმა ნელ-ნელა სახიფათო ნიშნულს მიაღწია. სწორედ ამ დროს, რობენმა საოცარი სისწრაფით გაარღვია მეტოქის დაცვა და პირისპირ აღმოჩნდა იკერ კასილასთან, რომელმაც გამაოგნებელი ოსტატობით მოიგერია დარტყმა. მინდვრის მეორე ნახევარზე ჩავი, ვილია, რამოსი და კაპდევილა უშედეგოდ ცდილობდნენ გოლის გატანას.და როდესაც შეხვედრამ კულმინაციას მიაღწია, ესპანეთის ეროვნულმა ნაკრებმა ყველას აჩვენა, რატომ იღებდა მონაწილეობას მსოფლიო ჩემპიონატის ფინალში. და, რაც უმთავრესი და ყველაზე მნიშვნელოვანია, რატომ იმსახურებდა გამარჯვებას. მოედანზე მხოლოდ ერთი გუნდი აჩვენებდა ნამდვილ ფეხბურთს. და ეს გუნდი იმსახურებდა ჯილდოს, რომელსაც უამრავი გული ელოდა. ეს 115 – ე წუთზე მოხდა, "სოქერ სითი სთეიდიუმი" თითქოს ჩრდილმა დაფარა. ჩესკ ფაბრეგასმა საჯარიმოში ანდრეს ინიესტა იპოვნა, სტეკელენბურგთან პირისპირ დარჩენილ მატჩის გმირს კი ბევრი აღარ უფიქრია და უძლიერესი დარტყმით გახვრიტა ჰოლანდიელთა კარი. მილიონობით "წითელი სულისგან" სიხარულის ტალღამ იფეთქა.
ყველაფერი ის, რაც შემდეგ მოხდა, უკვე ესპანური ფეხბურთის ისტორიის ნაწილია. "ფიფას" პრეზიდენტმა, იოზეფ ბლატერმა, იკერ კასილასს გადასცა მსოფლიო თასი, "ფურია როხას" კაპიტანმა კი იგი იოჰანესბურგის ზეცაში აღმართა. მსოფლიოს ახალი ჩემპიონი ჰყავს, მიესალმეთ გმირებს !
|